Rais
wa Jamhuri ya Muungano wa Tanzania na Amiri Jeshi Mkuu, Mheshimiwa Dkt.
Samia Suluhu Hassan, leo tarehe 25 Julai 2025, ameongoza maadhimisho ya
Siku ya Mashujaa yaliyofanyika kitaifa katika Uwanja wa Mashujaa,
Mtumba, Jijini Dodoma.
Maadhimisho hayo yamehudhuriwa na viongozi
mbalimbali wa kitaifa, wakiwemo Makamu wa Rais, Waziri Mkuu, Mawaziri,
Wakuu wa Majeshi ya Ulinzi na Usalama, Mabalozi wa nchi mbalimbali,
pamoja na wananchi kutoka sehemu mbalimbali za nchi.Katika tukio
hilo la heshima, Rais Samia aliweka shada la maua kwenye mnara wa
mashujaa ikiwa ni ishara ya kutambua na kuenzi mchango mkubwa wa
mashujaa waliopigania uhuru wa Tanzania, pamoja na wale waliotoa uhai
wao katika kulitumikia Taifa kwa uadilifu na moyo wa uzalendo.
Akihutubia
katika maadhimisho hayo, Rais Samia alisisitiza umuhimu wa kudumisha
amani, mshikamano na uzalendo miongoni mwa Watanzania, akibainisha kuwa
ni njia pekee ya kulinda heshima ya mashujaa waliotangulia mbele ya
haki.
“Siku hii ya Mashujaa ni siku ya kutafakari na kutambua
wajibu wetu wa kulinda uhuru na amani tuliyoachiwa na mashujaa wetu.
Tuendelee kuwaheshimu kwa matendo mema, kwa kufanya kazi kwa bidii na
kwa kulinda maslahi ya Taifa letu,” alisema Rais Samia.
Maadhimisho
hayo pia yalihusisha gwaride maalum la majeshi ya ulinzi na usalama,
burudani kutoka vikundi vya sanaa za majeshi, pamoja na dua na sala
kutoka kwa viongozi wa dini mbalimbali kwa ajili ya kuwaombea mashujaa
waliopoteza maisha yao kwa ajili ya Tanzania.
Siku ya Mashujaa
huadhimishwa kila mwaka tarehe 25 Julai kwa lengo la kuwakumbuka na
kuwaenzi mashujaa waliotoa mchango wao mkubwa katika kuleta uhuru na
maendeleo ya Taifa.
