TFS YAZINDUA MAFUNZO YA UKUSANYAJI TAKWIMU ZA ASALI NCHINI

Na Mwandishi Wetu, Dodoma

Serikali kupitia Wakala wa Huduma za Misitu Tanzania (TFS) imezindua mafunzo maalumu ya ukusanyaji takwimu za uzalishaji wa asali, hatua inayolenga kuongeza ufanisi na ukuaji wa sekta ya ufugaji nyuki nchini.

Akifungua mafunzo hayo jijini Dodoma leo Novemba 20,2025, Kaimu Mkurugenzi wa Misitu na Nyuki, Daniel Pangalasi, alisema mfumo mpya wa ukusanyaji takwimu utamaliza changamoto ya upatikanaji wa taarifa sahihi za uzalishaji.

“Kupitia mfumo huu tutakuwa na uhakika wa takwimu kutoka zinapokusanywa hadi zinapohifadhiwa,” alisema.

Awali, Kamishna Msaidizi wa Uhifadhi TFS, Zainabu Bungwa, aliwataka wataalamu wa nyuki kuongeza uzalishaji bila kukata tamaa, akisisitiza umuhimu wa kujifunza mbinu za kisasa.

Zaidi ya washiriki 25 kutoka TFS, wizara na taasisi za utafiti wanahudhuria mafunzo hayo ya siku tatu yanayoendeshwa na mtaalamu Victor Mgoo.