DC ILALA ASISITIZA USHIRIKIANO KUDUMISHA USALAMA

 Mkuu wa Wilaya ya Ilala, Mheshimiwa Edward Mpogolo, ametoa wito kwa wenyeviti wa mitaa na polisi kata kuimarisha ushirikiano katika kulinda amani na usalama ndani ya wilaya hiyo.

Wito huo umetolewa leo katika kikao kazi kilichowakutanisha Mkuu wa Wilaya, Viongozi wa Polisi wa Mkoa na Wilaya ya Ilala, Watendaji wa Kata pamoja na Wenyeviti wa Serikali za kilichofanyika katika Ukumbi wa Karimjee jijini Dar es Salaam.

Mheshimiwa Mpogolo amesema kuwa usalama wa wananchi unaanzia katika ngazi ya mtaa, hivyo ni wajibu kwa viongozi kufanya kazi kwa pamoja.

"Ulinzi na usalama unaanzia kwenye mtaa, hivyo ushirikiano wenu ndiyo nguzo ya amani ya wilaya yetu," amesema.

Aidha, amewataka viongozi hao kuwa walezi wa vijana, hususan waendesha bodaboda na wamachinga, kwa kuwa ni kundi muhimu katika shughuli za kila siku za wananchi. 

Amesema vijana hao wanahitaji muongozo wa karibu ili waendeshe kazi zao kwa kufuata sheria, kanuni na taratibu zilizopo. 

Sambamba na hilo, Mkuu huyo wa Wilaya ameahidi kutoa ushirikiano  kwa viongozi hao ili kuhakikisha amani na utulivu vinaendelea kudumishwa katika Wilaya ya Ilala.

Lengo la kikao kazi hicho ni   kuweka mikakati ya ulinzi na usalama katika maeneo yote ya wilaya ya ilala na kudumisha amani katika jamii